राष्ट्रपति रनिङ शिल्डको उपाधी पृथ्वी माध्यमिक विद्यालयलाई

राष्ट्रपति रनिङ शिल्ड प्रतियोगिता सञ्चालन निर्देशिका २०७०, पाँचौ संशोधन २०८० मा उल्लेख भएअनुसार लगातार तीन पटकसम्म रनिङ शिल्ड प्रतियोगितामा विजयी हुनेले सो रनिङ शिल्ड सधँैका लागि राख्न पाउने व्यवस्था छ । चार दिनसम्म सञ्चालन भएको प्रतियोगितामा सितोरियो कराँते र तेक्वान्दोसहित २६ स्वर्ण, २१ रजत २५ कास्य पदक ल्याएर पृथ्वी मावि बाक्सिलाले उपाधि जितेको हो ।

यही माघ–११ गतेबाट शुरु भएको प्रतियोगितामा आठ स्वर्ण, तीन रजत, एक कास्य पदकसहित शुक्रजित मावि दोस्रो र तीन स्वर्ण, छ रजत र एक कास्य पदकसहित जालपा मावि बाक्सिला तेस्रो भएको छ । प्रतियोगितामा एथलेटिक्सतर्फ जालपा माविका छात्रा अस्मिता खत्री, शुक्रजित माविका छात्र सन्देश विश्वकर्मा तथा भलिबलतर्फ शुक्रजित माविका छात्रा दिविशा राई र कुहुडाँडा माविका छात्र निशान राई उत्कृष्ट खेलाडी घोषित भएको आयोजकले जनाएको छ ।

राष्ट्रपति रनिङ शिल्ड प्रतियोगितामा विजयी प्रथम, द्धितीय र तृतीय हुने विद्यालयलाई क्रमशः नगद  ५० हजार,  ४५ हजार र  ४० हजारको साथमा शिल्ड, ट्रफी र प्रमाणपत्र प्रदान गरिएको गाउँपालिकाले जनाएको छ । प्रतियोगितामा विजयी विद्यालय तथा विद्यार्थीहरुलाई गाउँपालिका प्रमुख समिर राई, प्रमुख प्रशासकीय अधिकृत शौधन राई लगायतले पुरस्कार वितरण गर्नुभएको छ ।

प्रतियोगितामा गाउँपालिकाभित्र सञ्चालित नौँवटा माध्यमिक विद्यालयले सहभागिता जनाएको थियो । प्रतियोगितामा सहभागी विद्यालयलाई खाना तथा खाजाको लागि दूरीको आधारमा  ३५ हजार,  ३० हजार र  २५ हजार रकम प्रदान गरिएको गाउँपालिकाले जनाएको छ ।

राष्ट्रपति रनिङ शिल्ड प्रतियोगिताका लागि गाउँपालिकाले  दश लाख रकम विनियोजन गरेको थियो । अन्तर माध्यमिक विद्यालयस्तरीय राष्ट्रपति रनिङ शिल्ड प्रतियोगितामा छनोट भएका विद्यार्थीहरुले जिल्लास्तरीय प्रतियोगितामा सहभागिता जनाउनेछन ।