खोटाङ, ५ फागुन । विश्वप्रसिद्ध त्रिधार्मिकस्थल हलेसी बजारका आगलागी पीडितका लागि एकैदिनमा रु ११ लाख पाँच हजार राहत रकम सङ्कलन भएको छ । हलेसी तुवाचुङ नगरपालिकाका जनप्रतिनिधि, नगरपालिकामा कार्यरत स्थायी निजामती कर्मचारी, करारका कर्मचारी र शिक्षकबाट रु दश लाख तथा उद्योग वाणिज्य सङ्घ हलेसी शाखाले रु ५० हजार, खोटाङ प्राकृतिक विपद् व्यवस्थापन कोषले रु ४० हजार र सुदेवी कन्ट्रक्सन प्रा.लि. हलेसीले रु १५ हजार सहयोग उपलब्ध गराएको हो ।
हलेसी बजारका आगलागी पीडितका लागि जनप्रतिनिधि र स्थायी निजामती कर्मचारीको दुई÷दुई दिन तथा शिक्षक र करारका कर्मचारीको एक÷एक दिनको सेवासुविधा उपलब्ध गराइएको हलेसी तुवाचुङ नगरपालिकाका प्रवक्ता एवम् वडा नं. ७ महादेवस्थानका वडाध्यक्ष कमल गिरीले जानकारी दिनुभयो । हलेसी बजारका आगलागी पीडितका लागि माछापुछ«े बैङ्क हलेसी शाखामा खाता खोलेर क्यूआरमार्फत समेत रकम जम्मा गर्न मिल्नेगरी राहत सङ्कलन अभियान शुरु गरिएको जनाइएको छ ।
हलेसी तुवाचुङ नगरपालिका–७ महादेवस्थानस्थित हिन्दु, बौद्ध र किरात धर्मावलम्बीको सङ्गमस्थल हलेसी बजारमा फागुन–४ गते आइतबार राति भएको आगलागीबाट पीडित बनेकाहरुका लागि दुई महिना आर्थिक सहयोग सङ्कलन अभियान सञ्चालन गर्ने निर्णय गरिएको छ । नगरप्रमुख विमला राईको संयोजकत्वमा राजनीतिक दल, रेडक्रस, होटल व्यवसायी, इलाका प्रहरी कार्यालय हलेसी, समाजसेवी, विभिन्न सङ्घसंस्था र स्थानीयवासीको उपस्थितिमा बसेको बैठकले उक्त निर्णय गरेको हो ।
हलेसी बजारका स्थानीयवासी पदमशेर राईको भान्छा कोठाबाट शुरु भएको आगोले चारवटा घर, तीनवटा होटल, एउटा हार्डवेयर पसल, लघुवित्तको कार्यालय लगायत जलेर नष्ट भएको थियो । खाना पकाउनेक्रममा ग्यास लिक भएर शुरु भएको आगलागीमा पदमशेरको काठ र जस्तापाताले बनेको तीनतले घर, पहिलो तलामा राखिएको हार्डवेयर पसल, दोस्रो तलामा सञ्चलित निर्धन उत्थान लघुवित्त संस्थाको कार्यालय लगायतका सामग्री जलेर नष्ट हुँदा करिब रु चार करोड बराबरको क्षति भएको छ ।
साँझ करिब ७ः०० बजेबाट शुरु भएको आगलागीबाट स्थानीय आइराख राईको न्यू–कल्याण होटल, चार तले पक्की घर र घरको पछाडिपट्टी दुईतले काठको घर गरी रु दुई करोड ५० लाख बराबरको क्षति भएको छ । आगलागीमा परेर स्थानीय प्रकाशचन्द्र गिरीको हलेसी दर्शन होटलको फलामको ट्रसले बनेको एकतले भान्छा घर र दुईतले पक्की घरमा आंशिक क्षति हुँदा रु ३० लाख बराबरको क्षति भएको जनाइएको छ ।
आइराख राई्रको घरसँगै जोडिएको भरणशेर राईको पारुहाङ होटल, चारतले पक्की भवनको दोस्रो र तेस्रो तलामा आंशिक क्षति हुँदा अन्दाजी रु ५० लाख बराबरको भएको छ । हलेसी बजारमा भएको आगलागीमा रु सात करोड ३० लाख बढीको क्षति भएको प्रहरीको प्रारम्भिक प्रतिवेदनले देखाएको जिल्ला विपद् व्यवस्थापन समितिका संयोजक एवम् निमित्र प्रमुख जिल्ला अधिकारी हीराधन राईले जानकारी दिनुभएको छ ।
रातको समयमा भएको आगलागी नियन्त्रणमा लिनका लागि जिल्लाबाट रणभीम गण मुढे ब्यारेक, नेपाल प्रहरी, सशस्त्र प्रहरी बल नेपाल ७ नम्बर गुल्म, जिल्ला प्रशासन, जिल्लावासी लगायत गरी करिब ५०० जना खटिएका थिए । साँझ करिब ७ः०० बजेतिर शुरु भएको आगो साढे चार घण्टापछि साढे ११ बजेमात्र नियन्त्रणमा आएको थियो ।
सुख्खाग्रस्त क्षेत्रमा पर्ने हलेसी बजारमा भएको आगलागी नियन्त्रणमा लिनका लागि पानी अभाव भएकाले समस्या भएको ईलाका प्रहरी कार्यालय हलेसीका प्रमुख प्रहरी निरीक्षक हेमन्त राईले जानकारी दिनुभएको छ । मध्यपहाली लोकमार्ग अन्तरगत दिक्तेल–हलेसी सडकखण्डमा पर्ने हलेसी बजारमा भएको आगलागीका घटनालाई दमकल अभावका कारण समयमै नियन्त्रण गर्न नसक्दा ठूलो क्षति भएको हो ।
