खोटाङ, १० जेष्ठ । खोटाङमा सामाजिक सूरक्षाभत्तामा व्यापक अनियमितता भएको पाइएको छ । दिक्तेल रुपाकोट मझुवागढी नगरपालिका–१ दिक्तेलमा सामाजिक सुरक्षाभत्तामा व्यापक अनियमितता भएको खुलासा भएको हो।
आर्थिक वर्ष २०७४ सालदेखी २०७६÷७७ आर्थिक वर्षमा सामाजिक सुरक्षाभत्ता दुरुपयोग भएको प्रमाण एतिबेला विभिन्न अनलाइन सञ्चारमाध्यमहरूले समाचार सार्वजनिक गरेका छन् । सामाजिक सुरक्षाभत्तामा व्यापक अनियमितता भएको गोप्य सुचना आएपछि सत्यतथ्य बुझ्न वडामा गएर सूचना माग्दा सूचना दिनै आलटाल गरिएको थियो । सूचनाको हक सम्बन्धी ऐन २०६४ को दफा ३ बमोजिम आएको सूचना अनुसार दिक्तेल–१ दिक्तेलमा सामाजिक सुरक्षाभत्ता अनियमितता भएको पाइएको हो । जसअनुसार एउटै व्यक्तिको नाम दुई÷दुई ठाउँमा उल्लेख गरेर सामाजिक सुरक्षाभत्ता बुझेको पाइएको छ ।
मृत्यु भएका, दोहोरो नाम गरेका, नागरिकता नम्मर एउटै तथा विवरणमा नाम नभएकाहरूलाई समेत सामाजिक सुरक्षाभत्तामा समावेश गरेर रकम बुझेको देखिएको छ । एउटै नाम नागरिकता नम्मर उल्लेख गरेर तुलसादेवी आचार्य, तुलसा आचार्य, देउबहादुर देउजा, नरमायाँ आचार्य, मिनाकुमारी श्रेष्ठ, बिष्णुमायाँ आचार्य, मोहनकुमारी राजभण्डारी र मुत्यु भैसकेका रत्नप्रसाद आचार्य लगायतको नाम उल्लेख गरेर सामाजिक सुरक्षाभत्ताको रकम त्यहाँका जनप्रतिनिधी र वडा सचिवको मिलेमतोमा रकम बुझेको पाइएको हो ।
यता,सोही वडाकी निर्वतमान वडा सदस्य अन्जना केशी –हाल निर्वाचित महिला सदस्यले विधुवा भत्तासमेत बुझिलिएको पाइएको छ । एउटै व्यक्तिले दुई तिरबाट राज्यबाट एउटा सुविधा लिएपछि अर्कोतिरबाट लिन नपाउने भएतापनी कतिपय जनप्रतिनिधिले दुबै तिरबाट सेवासुविधा बुझ्ने गरेको स्थानीयले आरोप लगाएका छन् ।
